12 अगस्त 2016

ଭାରତକୁ ମାଡ଼ି ନଆସୁ GM ସୋରିଷ ବିପଦ

ଜିଏମ୍ ସୋରିଷର ବିପଦକୁ ନେଇ ଆଲୋଚନାଚକ୍ର
ସ୍ଥାନ: ରେଡ୍‌କ୍ରସ୍‌ଭବନ, ଭୁବନେଶ୍ୱର
ସମୟ: ୨୧ ଅଗଷ୍ଟ୨୦୧୬, ରବିବାର, ପୂର୍ବାହ୍ଣ ୧୦ଟା ୩୦

ଅତୀତରେ ଆମେ ଜିନ୍ ପରିବର୍ତିତ ବାଇଗଣ ପ୍ରଚଳନର ପ୍ରଚେଷ୍ଟାକୁ ମିଳିତ ଭାବରେ ପ୍ରତିବାଦ କରି ତା ଉପରେ ପ୍ରତିବନ୍ଧକ ଲଗେଇବାରେ ସଫଳ ହୋଇଥିଲେ। ପରବର୍ତୀ ସମୟରେ ପଛ ଦ୍ୱାର ଦେଇ ପୁଣି ଥରେ ଜିଏମ୍ ବିହନ ପ୍ରଚଳନ ପାଇଁ BRAI ନାମକ ବିଲ୍ ସଂସଦରେ ଆଗତ କରିବାର ଚେଷ୍ଟା ହୋଇଥିଲା। ଦେଶବ୍ୟାପୀ ବିରୋଧ କାରଣରୁ ସେ ବିଲ୍‌ ମଧ୍ୟ ଆଗତ ହୋଇପାରି ନଥିଲା। ୨୦୧୪ ସଂସଦ ନିର୍ବାଚନ ବେଳେ ବର୍ତମାନ କେନ୍ଦ୍ରରେ ଶାସନ କରୁଥିବା ଭାଜପା ଦଳ ନିଜ ଇସ୍ତାହାରରେ ଜିଏମ୍ ଫସଲକୁ ବିରୋଧ କରିବା ପାଇଁ ପ୍ରତିଶ୍ରୁତି ଦେଇଥିଲା। କିନ୍ତୁ ସରକାରକୁ ଆସିବା ପରେ ଜିଏମ୍ ବିହନର ପ୍ରଚଳନ ପାଇଁ ଚେଷ୍ଟା ଜାରି ରଖିଛି। ବିଭିନ୍ନ ଚାଷୀ ସଂଗଠନ, କିଛି ପ୍ରଗତିଶୀଳ ରାଜନୈତିକ ଦଳ ଓ ନାଗରିକ ସଂଗଠନମାନଙ୍କ ବିରୋଧ କାରଣରୁ ଏ ସରକାରକୁ ପଛଘୁଞ୍ଚା ଦେବାକୁ ଏଯାଏଁ ବାଧ୍ୟ ହେବାକୁ ପଡିଛି। କିନ୍ତୁ ନୀତିଗତ ଭାବରେ ଭାଜପା ଜିଏମ୍ ସପକ୍ଷରେ ଓ କେନ୍ଦ୍ରସରକାର କର୍ପୋରେଟ୍ ସ୍ୱାର୍ଥରେ ଯେ କୌଣସି ମୁହୂର୍ତରେ ଜିଏମ୍ ସୋରିଷ ପ୍ରଚଳନର ନିଷ୍ପତ୍ତି ନେଇ ପାରନ୍ତି। ଜିଏମ୍ ସୋରିଷର ପ୍ରଚଳନ ପାଇଁ ସରକାର ଖୁବ୍ ବ୍ୟସ୍ତ ସେ କଥା ବିଭିନ୍ନ ସୂତ୍ରରୁ ଜଣାପଡୁଛି। ସୋରିଷ, ଓଡିଶା କାହିଁକି ସାରା ଭାରତର ଖାଦ୍ୟ ସଂସ୍କୃତିରେ ଏକ ବିଶିଷ୍ଟ ଭୂମିକା ତୁଲାଉଛି। ସୋରିଷ, ଖାଇବା ତେଲ ଓ ବିଭିନ୍ନ ରନ୍ଧନ ପ୍ରକ୍ରିୟାରେ ବ୍ୟବହାର ହେବା ଛଡା ଔଷଧୀୟ ଗୁଣ ପାଇଁ ଆମର ଦୈନନ୍ଦିନ ଜୀବନ ସହ ଅଙ୍ଗାଙ୍ଗୀ ଭାବେ ଜଡିତ। ଖାଦ୍ୟରେ, ବେସରରେ, ପ୍ରସାଦରେ ଯେଉଁ ସୋରିଷ ସାଧାରଣ ଉପାଦାନ ରୂପେ ରହି ଆସିଛି, ତାହାରି ଜରିଆରେ ଆମ ଖାଦ୍ୟ ଥାଳି ଓ ସଂସ୍କୃତିରେ ବିଷ ଗୋଳି ଦେବା ପାଇଁ ଆମ ସରକାର ଓ କର୍ପୋରେଟ୍ ଗୋଷ୍ଠୀ ଚକ୍ରାନ୍ତ ଜାରି ରଖିଛନ୍ତି। ଆଉ ଜିଏମ୍ ସୋରିଷକୁ ଏକ ଅନୁକୂଳ ଖୁଣ୍ଟି ଭଳି ସେମାନେ ବାଛିଛନ୍ତି। ଥରେ ଜିଏମ୍ ସୋରିଷ ପ୍ରଚଳିତ ହେଲେ ତାପରକୁ ଅନ୍ୟ ଫସଲରେ ଜିଏମ୍‌ର ପ୍ରବେଶ ନିଷ୍କଣ୍ଟକ ହୋଇଯିବ। ଅଣଖାଦ୍ୟ ଫସଲ ଭାବେ ବିଟି କପା କେମିତି ସାରା ଭାରତରେ ଆତ୍ମହତ୍ୟାର ବୀଜ ପାଲଟିଛି, ତାହା ଆମେ ସଭିଁଏ ଜାଣୁ। ପରିସ୍ଥିତିକୁ ନଜରରେ ରଖି ଜିଏମ୍ ବିହନ ବା ଫସଲ ପ୍ରଚଳନର ସଫଳ ବିରୋଧ ପାଇଁ ଆମକୁ ଦଳମତ ନିର୍ବିଶେଷରେ ପ୍ରସ୍ତୁତ ହେବାକୁ ପଡିବ। ଚାଷୀର ବିହନ ଆତ୍ମନିର୍ଭରତା, ନାଗରିକ ମାନଙ୍କର ବିଷମୁକ୍ତ ଖାଦ୍ୟ ଭୋଜନ ଅଧିକାର ଏବଂ ସାମଗ୍ରିକ ଭାବରେ ଭାରତର କୃଷି ଓ ଖାଦ୍ୟ ବ୍ୟବସ୍ଥା ଉପରେ ମୁଷ୍ଟିମେୟ ବହୁରାଷ୍ଟ୍ରୀୟ କମ୍ପାନୀମାନଙ୍କର ନିୟନ୍ତ୍ରଣର ଅନ୍ୟ ନାମ ହେଲା ଜିଏମ୍। ଏ ସଂପର୍କରେ ଆଲୋଚାନାଚକ୍ର ସହ ଜିଏମ୍ ସୋରିଷ ପ୍ରଚଳନର ବିରୋଧକୁ ରାଜ୍ୟ ଓ ଦେଶରେ ବ୍ୟାପକ କରିବା ପାଇଁ ଏକ ରଣନୀତି ସ୍ଥିର କରିବା ଉଦ୍ଦେଶ୍ୟରେ ଏକ କାର୍ଯ୍ୟକ୍ରମ ଆଗାମୀ ଅଗଷ୍ଟ ୨୧ ତାରିଖ ଦିନ ଭୁବନେଶ୍ୱରର ରେଡ଼୍‌କ୍ରସ୍ ଭବନରେ ଅନୁଷ୍ଠିତ ହେବ। ଏଥିରେ ଏଲାଏନ୍ସ ଫର ସଷ୍ଟେନେବୁଲ ଏଣ୍ଡ ହୋଲିଷ୍ଟିକ୍ ଏଗ୍ରିକଲଚର୍‌ - ଇଣ୍ଡିଆର ରାଷ୍ଟ୍ରୀୟ ସଂଯୋଜିକା କବିତା କୁରୁଗୁଣ୍ଟି ଯୋଗ ଦେବେ। ଏହି କାର୍ଯ୍ୟକ୍ରମରେ ଓଡିଶାର ବିଭିନ୍ନ କୃଷକ ସଂଗଠନ, ନାଗରିକ ସଂଗଠନ, ସାମାଜିକ ସଂଗଠନ ତଥା ରାଜ୍ୟର ପ୍ରଗତିଶୀଳ ରାଜନୈତିକ ଦଳଗୁଡିକର ପ୍ରତିନିଧିମାନଙ୍କୁ ମଧ୍ୟ ଭାଗ ନେବାକୁ ଅନୁରୋଧ କରାଯାଇଛି। ଏହି କାର୍ଯ୍ୟକ୍ରମରେ ଆପଣଙ୍କର ଉପସ୍ଥିତି ଏକାନ୍ତ କାମ୍ୟ।

ନିବେଦକ

ସରୋଜ

ଏଲାଏନ୍ସ ଫର ସଷ୍ଟେନେବୁଲ ଏଣ୍ଡ ହୋଲିଷ୍ଟିକ୍ ଏଗ୍ରିକଲଚର୍‌ - ଇଣ୍ଡିଆ ଓ ଦେଶୀ ବିହନ ସୁରକ୍ଷା ମଂଚ, ଓଡ଼ିଶା

ଯୋଗାଯୋଗ: ୮୮୯୫୧୫୭୦୬୬

ସବିଶେଷ ଅବଧାରଣା ପାଇଁ / For details about GM Mustard and similar organisms
http://bharatbasi.blogspot.in/2016/08/25-reasons-to-say-no-to-gm-mustard.html