ଇଂଲିଶିଆ ବନାନ ବଦଳିବ କେବେ?

ବ୍ରିଟିଶ ଶାସନ ଅଧୀନରୁ ସ୍ୱାଧୀନତା ପାଇବା ପରେ ଭାରତର ଅନେକ ସ୍ଥାନର ଇଂଲିଶିଆ (Anglicised) ନାମଗୁଡ଼ିକ ବଦଳାଯାଇ ତହିଁରେ ଭାରତୀୟତା ଭରି ଦିଆଯାଇଛି। ମହାନଗରୀଗୁଡ଼ିକରେ ବିଭିନ୍ନ ଇଂଲିଶ ଚାକିରିଆ ବା ଲାଟସାହାବମାନଙ୍କ ନାମାନୁସାରେ ହୋଇଥିବା ସଡ଼କ, ଗଳି, ଛକ, ରାସ୍ତା ଇତ୍ୟାଦିର ନାମକୁ କ୍ରମାଗତ ଭାବରେ ବଦଳାଯାଇ ଭାରତୀୟ ମହାପୁରୁଷ ବା ବ୍ୟକ୍ତିତ୍ୱମାନଙ୍କ ନାମରେ କରାଯାଉଛି। ସେହି ପ୍ରକ୍ରିୟା ଏବେ ବି ସରି ନାହିଁ। ତେବେ ଯେତିକି ନାମ ବଦଳାଯାଇଛି, ତାହାକୁ ମଧ୍ୟ ସ୍ୱାଧୀନ ଦେଶର ନାଗରିକମାନେ ବ୍ୟବହାର ନକରି ପୁରୁଣାକାଳିଆ ଇଂଲିଶିଆ ନାମକୁ ବ୍ୟବହାର କରି ନିଜର ଗୋଲାମୀ ପ୍ରବୃତ୍ତିକୁ ଦେଖାଇ ଚାଲିଛନ୍ତି। ଦେଶର ଯେଉଁ ପ୍ରମୁଖ ସ୍ଥାନଗୁଡ଼ିକର ନାମ ବଦଳାଯାଇଛି, ତାହାର ଏକ ତାଲିକା ତଳେ ଦିଆଗଲା:

କ୍ରମ	କ’ଣ ଥିଲା (in English)	କ’ଣ ଥିଲା (ଓଡ଼ିଆରେ)	କ’ଣ ହେଲା (in English)	କ’ଣ ହେଲା (ଓଡ଼ିଆରେ)	କେବେ ହେଲା
୧	Trichinapoly	ତ୍ରିଚିନ୍ନାପଲୀ	Tiruchirapalli	ତିରୁଚିରାପଲ୍ଲୀ	1971
୨	Baroda	ବରୋଦା	Vadodara	ବଡ଼ୋଦରା	1974
୩	Trivandrum	ତ୍ରିଭାନ୍ଦ୍ରମ୍	Thiruvananthapuram	ତିରୁଅନନ୍ତପୁରମ୍	1991
୪	Bombay	ବମ୍ବେ	Mumbai	ମୁମ୍ବାଇ	1996
୫	Madras	ମାଡ଼୍ରାସ୍	Chennai	ଚେନ୍ନାଇ	1996
୬	Cochin	କୋଚିନ୍	Kochi	କୋଚି	1996
୭	Calcutta	କାଲକାଟା, କଲିକତା, କଲ୍‌କତ୍ତା (ହିନ୍ଦୀରେ)	Kolkata	କୋଲ୍‌କାତା	2001
୮	Pondicherry	ପଣ୍ଡିଚେରୀ	Puducherry	ପୁଡୁଚେରୀ	2006
୯	Cawnpore	କ’ନପୋର୍	Kanpur	କାନପୁର	1947
୧୦	Belgaum	ବେଲଗାଓଁ	Belagavi	ବେଲାଗାୱି	2014
୧୧	Indhur	ଇନ୍ଧୁର	Indore	ଇନ୍ଦୋର	1947
୧୨	Panjim	ପାଞ୍ଜିମ୍	Panaji	ପାଣାଜୀ	1960
୧୩	Poona	ପୁନା	Pune	ପୁଣେ	1977
୧୪	Simla	ସିମ୍‌ଲା	Shimla	ଶିମ୍‌ଲା	1950
୧୫	Benares	ବନାରସ୍, କାଶୀ	Varanasi	ବାରାଣାସୀ	1956
୧୬	Waltair	ୱାଲଟିୟର୍	Visakhapatnam	ବିଶାଖାପଟନମ୍	1987
୧୭	Tanjore	ତାଞ୍ଜୋର	Thanjavur	ତାଞ୍ଜାଭୁର	1948
୧୮	Jubbulpore	ଜବ୍ବଲପୋର	Jabalpur	ଜବଲପୁର	1956
୧୯	Ootacamund	ଉତ୍କାମଣ୍ଡ୍	Udhagamandalam	ଉଦ୍‌ଗାମଣ୍ଡଳମ୍	1950
୨୦	Calicut	କାଲିକଟ୍	Kozhikode	କୋଝିକୋଡ଼୍	1949
୨୧	Gauhati	ଗୌହାଟୀ	Guwahati	ଗୁଆହାଟୀ	1980
୨୨	Allepey	ଆଲେପି	Alappuzha	ଅଲାପୁଝା	1957
୨୩	Mysore	ମୈସୋର୍	Mysuru	ମୈସୁରୁ	2014
୨୪	Mangalore	ମାଙ୍ଗାଲୋର୍	Mangaluru	ମାଙ୍ଗାଲୁରୁ	2014
୨୫	Bangalore	ବାଙ୍ଗାଲୋର	Bengaluru	ବେଙ୍ଗାଲୁରୁ	2014
୨୬	Gurgaon	ଗୁର୍‌ଗାଓଁ	Gurugram	ଗୁରୁଗ୍ରାମ	2016

ନାମ ପରିବର୍ତନ କ୍ଷେତ୍ରରେ ମଧ୍ୟ ଦେଶର ସଚେତନ, ଶିକ୍ଷିତ ଓ ଅଗ୍ରଣୀ ରାଜ୍ୟ କେରଳ ବେଶ୍ ଆଗରେ। ଉପର ତାଲିକାରେ କିଛି ନାମ ରହିଥିବା ବେଳେ, ଅଳ୍ପ ପରିଚିତ ଆଉ କିଛି ସ୍ଥାନର ପରିବର୍ତିତ ପ୍ରତିରୂପ ତଳ ତାଲିକାରେ ଦିଆଗଲା:

କ୍ରମ	ଇଂଲିଶିଆ ସ୍ଥାନ ନାମ	ଓଡ଼ିଆରେ ସେହି ନାମ	ପରିବର୍ତିତ ନାମ	ଓଡ଼ିଆରେ ନୂଆ ନାମ
୧	Trichur	ତ୍ରିଚୁର	Thrissur	ତ୍ରିଶୁର
୨	Quilon	କୁଇଲନ୍	Kollam	କୋଲ୍ଲମ୍
୩	Palghat	ପାଲଘାଟ୍	Palakkad	ପଲକ୍କଡ଼୍
୪	Cranganore	କ୍ରାଙ୍ଗାନୋର୍	Kodungallur	କୋଡ଼ୁଙ୍ଗାଲୁର
୫	Tellichery	ତେଲିଚେରୀ	Thalasseri	ଥଲସେରି
୬	Cannanore	କୁନ୍ନାନୋର	Kannur	କନ୍ନୁର
୭	Diamper	ଡାୟାମ୍ପର	Udayamperoor	ଉଦୟମପେରୁର୍
୮	Sherthalai	ସେରତଲାଇ	Cherthala	ଚେରଥଲା
୯	Quilandy	କୁଇଲାଣ୍ଡି	Koilandi	କୋଇଲଣ୍ଡି
୧୦	Changanacherry	ଚଙ୍ଗନାଚେରୀ	Changanassery	ଚଙ୍ଗନାସେରୀ
୧୧	Sultan`s Battery	ସୁଲତାନଙ୍କ ବ୍ୟାଟେରୀ	Sulthanbatheri	ସୁଲତାନବଥେରି

ଏହି କ୍ରମରେ ଓଡ଼ିଶାର ନାମ Orissa(ଓରିଶା) ରୁ ଓଡ଼ିଶା (Odisha) ଏବଂ ‘ଓଡ଼ିଆ’ ଶବ୍ଦଟି Oriya(ଓରିୟା)ରୁ ଓଡ଼ିଆ (Odia) ହେଲା ସାଂବିଧାନିକ ସଂଶୋଧନ ବଳରେ ୨୦୧୧ ନଭେମ୍ବରରେ। ଚାହୁଁଚାହୁଁ ସାଢେ ଚାରି ବର୍ଷ ହୋଇଗଲାଣି। ହେଲେ ଏବେ ବି ସରକାରୀ ୱେବ୍‌ସାଇଟ୍‌ରେ Orissa ଓ Oriya ଦେଖିବାକୁ ମିଳୁଛି। ତେବେ ଓଡ଼ିଶାର ସ୍ଥାନର ନାମ ବଦଳାଇବା ପାଇଁ କେବଳ ପ୍ରାଶାସନିକ ନିର୍ଦେଶନାମା ଯଥେଷ୍ଟ। ଏଥିପାଇଁ ସମ୍ବିଧାନ ସଂଶୋଧନ ଅନାବଶ୍ୟକ। ତେବେ ସେହି ପ୍ରାଶାସନିକ ନିର୍ଦେଶନାମା, ଗେଜେଟ୍ (ରାଜପତ୍ର) ବିଜ୍ଞପ୍ତି ରୂପେ ପ୍ରକାଶ ପାଇଲେ ଉତ୍ତମ। ଓଡ଼ିଶାର ବରହମପୁର ବା ବ୍ରହ୍ମପୁର ସହରରେ ଥିବା ରେଳଷ୍ଟେସନର ନାମକୁ ଭାରତୀୟ ରେଳବାଇ
Brahmapur (ବ୍ରହ୍ମପୁର) ନାମରେ ଲେଖୁଥିବା ବେଳ ରାଜ୍ୟ ସରକାରଙ୍କର ଚେତା ପଶୁନାହିଁ, ସେହି ବନାନକୁ ସ୍ଥାୟୀ ଭାବରେ ଗ୍ରହଣ କରିବା ପାଇଁ। ଅବଶ୍ୟ ପଶ୍ଚିମବଂଗର Behrampur ଠାରୁ ଫରକ ଦର୍ଶାଇବା ପାଇଁ ଭାରତୀୟ ରେଳବାଇର ଏହା ଏକ ଫିକର। ତଥାପି ଏହା ଯୁକ୍ତିସମ୍ମତ ହୋଇଥିବାରୁ, ବିନା ବିତର୍କରେ ରାଜ୍ୟ ପ୍ରଶାସନ, ନାମ ସଂଶୋଧନକୁ ଗୋଟିଏ ନିର୍ଦେଶନାମା ବଳରେ ସାକାର କରୁ।

୧୯୯୨ ମସିହାରେ ଜିଲ୍ଲା ପୁନର୍ଗଠନ ପରେ ଦୁଇଟି ନୂଆ ଜିଲ୍ଲା ନୂଆପଡ଼ା ଓ ନବରଙ୍ଗପୁର, ସେମାନଙ୍କର anglicised ନାମକୁ ଫିଙ୍ଗି ସାରିଥିବା ବେଳେ କଟକ, ବାଲେଶ୍ୱର, ଖୋର୍ଧା, କେନ୍ଦୁଝର ଏବେ ବି ସେହି ଇଂଲିଶିଆ ବିକୃତନାମକୁ ଜାବୋଡ଼ି ରଖିଛନ୍ତି। Nawaparaରୁ Nuapada(ନୂଆପଡ଼ା), Nowrangpur ବା Nawarangpurରୁ Nabarangpur (ନବରଙ୍ଗପୁର) ହୋଇସାରିଛି। ଏପରିକି Sundergarh ମଧ୍ୟ ନିଜକୁ Sundargarh (ସୁନ୍ଦରଗଡ଼) କରିସାରିଥିବା ବେଳେ ଓଡ଼ିଶାର ସାଂସ୍କୃତିକ ପ୍ରାଣକେନ୍ଦ୍ର ତଥା ପ୍ରାଚୀନ ସହରଗୁଡ଼ିକ ଯଥା:- Cuttack, Berhampur, Balasore, Jeypore ଆଦି anglicised ନାମକୁ ଆଜି ସୁଦ୍ଧା ଧରି ରଖିବା ଏକ ଲଜ୍ଜାକର ପ୍ରସଙ୍ଗ। ଏହା ପ୍ରାଶାସନିକ ବା ବ୍ୟବସ୍ଥାପିକା ସ୍ତରରେ କାହାରି ମୁଣ୍ଡକୁ ଢୁକୁ ନାହିଁ! ଦୁଃଖର କଥା ଯେ ଦୂରଦୃଷ୍ଟି ସମ୍ପନ୍ନ କେରଳୀ ପ୍ରାଶାସନିକ ଅଧିକାରୀ କେହି ଜଣେ ବି ଓଡ଼ିଶାରେ ନାହାନ୍ତି। ତଥାପି ଶିକ୍ଷିତ ଓଡ଼ିଶା ନାଗରିକେ ସାମୂହିକ ଇଚ୍ଛାଶକ୍ତି ପ୍ରୟୋଗ କଲେ, ସଂସ୍କାର ସମ୍ଭବ ହୋଇପାରିବ।

କ୍ରମ	କ’ଣ ଅଛି ଇଂଲିଶରେ ସ୍ଥାନର ନାମ	ଠିକ୍ ପଢ଼ିଲେ କେମିତି (ଓଡ଼ିଆରେ)	କ’ଣ ହେବା କଥା ଇଂଲିଶରେ	ଓଡ଼ିଆରେ ସ୍ଥାନର ନାମ
୧	Cuttack	ସୁତ୍ତାକ୍	Katak	କଟକ
୨	Balasore	ବାଲାସୋର୍	Baleshwar	ବାଲେଶ୍ୱର
୩	Berhampur	ବରହମପୁର	Brahmapur	ବ୍ରହ୍ମପୁର
୪	Bissam Cuttack	ବିଷମକଟକ	Bhishma Katak	ଭୀଷ୍ମକଟକ
୫	Khurda	ଖୁର୍ଦା	Khordha	ଖୋରଧା
୬	Keonjhar	କେଉଁଝର	Kendujhar	କେନ୍ଦୁଝର
୭	Kendrapara	କେନ୍ଦ୍ରାପରା	Kendrapada	କେନ୍ଦ୍ରାପଡ଼ା
୮	Salipur	ସାଲିପୁର	Salepur	ସାଲେପୁର
୯	Tyendakura	ତ୍ୟେଣ୍ଡାକୁରା	Tendakuda	ତେଣ୍ଡାକୁଡ଼ା
୧୦	Bondamunda	ବଣ୍ଡମୁଣ୍ଡା	Bondhamunda	ବନ୍ଧମୁଣ୍ଡା
୧୧	Jeypore	ଜେଏପୋର୍	Jayapur	ଜୟପୁର
୧୨	Hinjilicut	ହିଂଜିଳିକଟ୍	Hinjilikatu	ହିଂଜିଳିକାଟୁ
୧୩	Chatrapur	ଚତ୍ରପୁର	Chhatrapur	ଛତ୍ରପୁର
୧୪	Jajapur Road	ଯାଜପୁର ରୋଡ଼	Vyasanagar	ବ୍ୟାସନଗର
୧୫	Balangir	ବଲାଙ୍ଗିର	Bolangir	ବଲାଙ୍ଗୀର
୧୬	Khariar	ଖରିଆର	Khadial	ଖଡ଼ିଆଳ
୧୭	Rairakhol	ରାଇରାଖୋଲ	Redhakhol	ରେଢ଼ାଖୋଲ

ନୂଆପଡ଼ା ଏବେ ବି କେନ୍ଦ୍ର ସରକାରଙ୍କ ଖାତାଖତିୟାନରେ Nawapara ହୋଇ ରହିଛି। କାରଣ ଭାରତ ସରକାରଙ୍କ ପ୍ରାଦେଶିକ/ ଆଞ୍ଚଳିକ ଅଧିକାରୀମାନଙ୍କ ସହ, ରାଜ୍ୟ ବା ଜିଲ୍ଲାର ପ୍ରାଶାସନିକ ମୁଖ୍ୟ କୌଣସି ପତ୍ରାଳାପ କରି ନାହାନ୍ତି। ତେଣୁ ପ୍ରାଶାସନିକ ନିର୍ଦେଶନାମା କେବଳ ରାଜ୍ୟ ଓ ରାଜ୍ୟବାସୀଙ୍କୁ ହୋଇଥିବା ବେଳେ ଖାତାଖତିୟାନରେ ବଦଳିବା ପାଇଁ କେନ୍ଦ୍ର ସରକାରଙ୍କ ସ୍ଥାନୀୟ ବରିଷ୍ଠ ଅଧିକାରୀମାନଙ୍କୁ ମଧ୍ୟ ଲେଖିବାକୁ ହେବ।

ପୁଣି ଆରମ୍ଭ କରନ୍ତୁ SMS ସଂପର୍କ

ଏବେ ଦେଖାଯାଉଛି ସ୍ମାର୍ଟଫୋନ‌୍ ବ୍ୟବହାରକାରୀମାନେ WhatsApp ମାୟାରେ ଏତେ ମାତ୍ରାରେ ପଡ଼ି ଯାଇଛନ୍ତି ଯେ ତାରବିହୀନ ଫୋନ୍ ସେବାର ମୌଳିକ SMS ସେବାକୁ ଭୁଲିଯାଇଛନ୍ତି। ଅବଶ୍ୟ ଭୁଲିଯିବା ପାଇଁ ଭାରତ ସରକାର ଏକ ପରିସ୍ଥିତିର ଚାପ ପକାଇଥିଲେ ୨୦୧୨ ମସିହାରେ। ଘଟଣାଟି ହେଉଛି, ଉତ୍ତର-ପୂର୍ବ(North-East) ଭାରତର ଲୋକମାନଙ୍କୁ କିଛି ଉଗ୍ରବାଦୀ ହାଣିପକାଇବେ ବୋଲି ଏକ MMS ବା SMS କେଉଁଠୁ ଆସିଥିଲା ବେଙ୍ଗାଲୁରୁରେ ଥିବା କେହି ଉତ୍ତର-ପୂର୍ବାଞ୍ଚଳର ନାଗରିକଙ୍କ ପାଖକୁ। ତୁଣ୍ଡବାଇଦ ଆକାରେ ଓ ସେହି SMSର ଫରୱାର୍ଡ଼ିଙ୍ଗ ଆକାରେ ତାହା ଏମିତି ବ୍ୟାପିଗଲା ଯେ ଲୋକମାନେ ହଜାର ହଜାର ସଂଖ୍ୟାରେ ନିଜ ଜନ୍ମସ୍ଥାନ ରାଜ୍ୟକୁ ବାହୁଡ଼ିବାରେ ଲାଗିଲେ। ସେଥିରେ ବଂଗ, ବିହାର ଓ ଉତ୍ତରପ୍ରଦେଶର ମଧ୍ୟ ହଜାର ହଜାର ଲୋକ ସାମିଲ ଥିଲେ। ତେଣୁ ଉତ୍ତର-ପୂର୍ବ ରାଜ୍ୟ ସମୂହକୁ ଯାଉଥିବା ରେଳଗାଡ଼ିଗୁଡ଼ିକରେ ଅଭୂତପୂର୍ବ ଭିଡ଼ ହେବାରେ ଲାଗିଲା। କେହି ବୁଝିବା ଅବସ୍ଥାରେ ନଥିଲେ କି କାହାକୁ ବୁଝାଇବା ମଧ୍ୟ ବେଙ୍ଗାଲୁରୁ ପ୍ରଶାସନ ବା କର୍ଣାଟକ ସରକାରଙ୍କର ଔକାତ ବାହାରେ ଥିଲା। ବାଧ୍ୟ ହୋଇ ସରକାର ସ୍ୱତନ୍ତ୍ର ରେଳଗାଡ଼ିର ବ୍ୟବସ୍ଥା କରିଥିଲେ, ଯେପରିକି ଭୟଭୀତ ଲୋକମାନେ ନିଜ ଇଚ୍ଛା ମୁତାବକ ନିଜ ଗାଅାଁକୁ/ ସହରକୁ ବାହୁଡ଼ି ଯାଇପାରିବେ। ସେୟା ହିଁ ହେଲା। କିନ୍ତୁ ଦେଶ ଭିତରେ ଏକ ଅାଶ୍ଚର୍ଯ୍ୟଜନକ ମନୋବୈଜ୍ଞାନିକ ବିପର୍ଯ୍ୟୟ ଦେଖାଦେଲା। ମଣିଷ ମଣିଷ ଭିତରେ ଅବିଶ୍ୱାସ ଓ ଘୃଣାର ବାତାବରଣ ଦେଖାଦେଲା। ଏହାର ଖିଅ ଖୋଜିବାରେ ଦେଶର ତଦନ୍ତକାରୀ ସଂସ୍ଥାମାନେ ନାକେଦମ୍ ହେଲେ। ଶେଷରେ କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରାଳୟ କହିଲା, ସେହି SMS ପାକିସ୍ତାନରୁ ଆସିଥିଲା। ଯାହାକି ଦେଶରେ ଆତଙ୍କ ସୃଷ୍ଟି କରିବାର ଏକ ନୂଅା ତରିକା ଥିଲା। ତେବେ ସେହି ଘଟଣା, ଅାମ ଦେଶର ପ୍ରଯୁକ୍ତିଗତ ନିରାପତ୍ତା ବ୍ୟବସ୍ଥାର ଦୁର୍ବଳତାକୁ ପଦାରେ ପକାଇ ଦେଲା। ଦୂରସଂଚାର ସେବା ଉପରେ ନିୟନ୍ତ୍ରଣ କରୁଥିବା ପ୍ରାଧିକରଣମାନେ ନିଷ୍ପତ୍ତି ନେଲେ ମୋବାଇଲ ଫୋନ‌୍ SMS ସେବାକୁ ୩ ମାସ ପାଇଁ ବନ୍ଦ କରି ଦିଆଯିବ। ସାଧାରଣ ଲୋକେ ଆଉ SMS ବା MMS ପଠାଇ ପାରିବେ ନାହିଁ। ତେଣୁ କେବଳ ମେସିନ୍ ପଠାଉଥିବା SMSଗୁଡ଼ିକ ପାଇଁ ଅନୁମତି ରହିଲା। ଯେମିତିକି ବ୍ୟାଙ୍କ୍, ବୀମା ଓ ଷ୍ଟକ୍ ମାର୍କେଟ‌୍ ଇତ୍ୟାଦି। ମଣିଷମାନେ ନିଜ ମୋବାଇଲରୁ SMS ପଠାଇବାର ମାର୍ଗଗୁଡ଼ିକୁ ପୂରା ବନ୍ଦ କରିଦିଆଗଲା। ଏପରିକି ସେକାଳରେ ୧୫ ଟଙ୍କାରେ ମାସକୁ ୧୫୦୦୦ SMS ପଠାଇବା ସୁବିଧାକୁ ବନ୍ଦ କରାଗଲା। ୩ ମାସ ପରେ ସେହି ସ୍କିମ୍ ର ଆଉ ପୁନଃପ୍ରଚଳନ ତ ହେଲା ନାହିଁ; ବରଂ SMSକୁ ମହଙ୍ଗା କରାଯିବା ସହ SMS ପଠାଇବାର ଦୈନିକ ଓ ମାସିକ ସଂଖ୍ୟାକୁ ଅତି ସଂକୁଚିତ କରାଯାଇଥିଲା। ପରିଣତି ଏପରି ହେଲା ଯେ ମୋବାଇଲଫୋନ୍ ବ୍ୟବହାରକାରୀମାନେ ପାରମ୍ପରିକ SMS ସେବାକୁ ଭୁଲି ସାରିଥିଲେ। ଯାହାର ଛାପ ଏବେ ସୁଦ୍ଧା ଲାଗି ରହିଛି ଏବଂ ସେହି ସ୍ଥାନକୁ ମାଡ଼ି ବସିଛି WhatsApp ଓ ଏହା ଭଳି ଏକାଧିକ SMSing App; କିନ୍ତୁ ସେହି Appଗୁଡ଼ିକ ପାଇଁ ଇଣ୍ଟରନେଟ୍ ସଂଯୋଗ ଜରୁରୀ ହେଉଥିବା ବେଳେ ପାରମ୍ପରିକ SMS ସେବାର ପ୍ରୟୋଗ ପାଇଁ କେବଳ ମାମୁଲି ନେଟୱାର୍କରେ ରହିବା ଜରୁରୀ ହୋଇଥାଏ। 

ଏବେ ୨୦୧୬-୧୭ ବର୍ଷରେ ପୁଣି SMS ସେବାକୁ ଉତ୍ସାହିତ କରାଯାଉଥିଲେ ସୁଦ୍ଧା ସ୍ମାର୍ଟଫୋନର କିମିଆରେ ପଡ଼ିଥିବା କୋଟି କୋଟି ଭାରତୀୟ ଆଉ ପାରମ୍ପରିକ SMSକୁ ମୁହଁ ଫେରାଉ ନାହାନ୍ତି। ଯାହାକି ଭାରତୀୟଙ୍କ ମଧ୍ୟରେ ସାମାଜିକ ସଂପର୍କକୁ ନକାରାତ୍ମକ ଭାବେ ପ୍ରଭାବିତ କରୁଛି। ଲୋକଙ୍କ ପାଖରେ ଅନ୍ୟର ଫୋନ‌୍ କଲ୍ ଗ୍ରହଣ କରିବାକୁ ସମୟ ନଥିବା ବେଳେ ପାରମ୍ପରିକ SMS ସେବା ସେମାନେ ବ୍ୟବହାର କରୁ ନାହାନ୍ତି। ଅଥବା SMS ପ୍ୟାକ୍ ସକ୍ରିୟ ନଥିବା ବେଳେ କୌଣସି SMS ପ୍ରେରଣ ପାଇଁ ମୋବାଇଲ ଫୋନର ମେନ୍ ବାଲାନ୍ସରୁ ଟଙ୍କାଏ ବା ଦେଢ଼ଟଙ୍କା ଖର୍ଚ କରିବାକୁ ଚାହୁ ନାହାନ୍ତି। ସଂପୃକ୍ତ ଦୂରସଂଚାର କମ୍ପାନୀର ବିଭିନ୍ନ ବିଜ୍ଞାପନଭିତ୍ତିକ SMS ଆସୁଥିବାରୁ, ସେହି ଭିଡ଼ ଭିତରେ କେହି ମଣିଷ ପଠାଉଥିବା SMSକୁ ମଧ୍ୟ ଅନେକ ବ୍ୟବହାରକାରୀ ଖୋଲୁ ନାହାନ୍ତି କି ଆଦୌ ପଢୁନାହାନ୍ତି। ଫଳରେ ମୋବାଇଲ ଫୋନର ସାନ୍ଦ୍ରତା ଦେଶରେ ବଢୁଥିଲେ ସୁଦ୍ଧା ମଣିଷ-ମଣିଷ ଭିତରେ ସଂପର୍କ କମିବାରେ ଲାଗିଛି। କାରଣ ବ୍ୟାଙ୍କ୍ ଓ ବୀମା ସଂସ୍ଥା ନାମରେ ଜାଲିଆତି କଲ୍ ଗ୍ରହଣ କରି ଅନେକ ଲୋକ ଅନଲାଇନ୍ ଲୁଟ୍ ର ଶିକାର ହେଉଥିବାରୁ ଅଜଣା ନମ୍ବରରୁ କଲ୍ ଗ୍ରହଣ କରିବାକୁ ଡରି ଗଲେଣି। ଯେଉଁ ମୋବାଇଲ ନମ୍ବର ବା ଫୋନ୍ ନମ୍ବର ନିଜ ହ୍ୟାଣ୍ଡସେଟରେ ସଂଚିତ କରି ନାହାନ୍ତି, ସେଭଳି ନମ୍ବରରୁ ଆସୁଥିବା କଲ୍ କୁ ଦେଖି ଅନେକ ଲୋକ ଆଦୌ ଫୋନ୍ ଉଠାଉନାହାନ୍ତି।

ତେଣୁ SMS ସୁବିଧାର ସୁଯୋଗ ନିଅନ୍ତୁ, ପ୍ରାପକ ଇଣ୍ଟରନେଟ୍ ବ୍ୟବହାର କରୁ ନଥିଲେ ବି SMS ପାଇ ପାରିବେ, ଯଦି ସେ SMS ଖୋଲୁଥିବା ଶିକ୍ଷିତ ଉପଭୋକ୍ତା ହୋଇଥିବେ। କ୍ଷୀଣ ସଂକେତ ସଂପନ୍ନ ନେଟୱାର୍କ ଥିଲେ ବି SMS ଦିଆନିଆ ସମ୍ଭବ। କିନ୍ତୁ ସେତିକି କ୍ଷୀଣ  ସିଗନାଲରେ ହୁଏତ କଥାବାର୍ତା ସମ୍ଭବ ହୋଇନପାରେ। ଅନ୍ୟ ପକ୍ଷରେ ନିର୍ବାକ ଯୋଗାଯୋଗ ପାଇଁ SMS ଉତ୍ତମ। ବିଶେଷତଃ ସଭାରେ ଓ ପ୍ରେକ୍ଷାଳୟରେ ଥିବା ବେଳେ SMS ହିଁ ଯୋଗାଯୋଗର ସ୍ରୋତ ପାଲଟିଯାଏ। ଏବେ ଲକ୍ଷ୍ୟ କରନ୍ତୁ ଓଡ଼ିଶାରେ ସେବା ଯୋଗାଉଥିବା ଦୂରସଂଚାର କମ୍ପାନୀମାନଙ୍କର ମାସିକିଆ SMS ପ୍ୟାକ୍ କିଭଳି ରହିଛି:-

କ୍ରମ	ଦୂରସଂଚାର କମ୍ପାନୀ ନାମ	ରିଚାର୍ଜ ଟଙ୍କା ପରିମାଣ	SMS ପଠାଇପାରିବେ (local/national)	ପ୍ୟାକ୍ ଅବଧି	ରିଚାର୍ଜ ବିକଳ୍ପ (ମେନ୍ ବାଲାନ୍ସରୁ କଟିବ)
୧	BSNL	31	385	30 ଦିନ	X
	BSNL	52	860	30 ଦିନ	X
	BSNL	83	1650	30 ଦିନ	X
୨	Airtel	39	500	28 ଦିନ	X
୩	Vodafone	38	500	28 ଦିନ	*444*38# କଲ୍...
୪	Reliance	39	500	28 ଦିନ	X
୫	Aircel	35	900	28 ଦିନ	*121*35# କଲ୍...
	Aircel	48	1250	28 ଦିନ	*121*48# କଲ୍...
୬	TATA GSM	36	900	28 ଦିନ	X
୭	Idea	33	450	28 ଦିନ	*369*33# କଲ୍...
	Idea	9	@10ପ./sms ଯେତେ	28 ଦିନ	*369*09# କଲ୍...